បែកធ្លាយរឿងអាស្រូវផ្លូវភេទរបស់តារា K-pop កូរ៉េ
តារាចម្រៀងប៉ប់កូរ៉េជាច្រើនកំពុងត្រូវបានគេទាក់ទងនិងហ៊ានផ្តល់ប្រាក់រាប់ពាន់ផោនសម្រាប់ការណាត់ជួបនិងរួមភេទជាមួយអ្នកជំនួញ។
បុគ្គលិកពីរនាក់របស់ក្រុមហ៊ុនថតបទចម្រៀងនៅកូរ៉េខាងត្បូងត្រូវបានចាប់ខ្លួន បន្ទាប់ពីមានការចោទប្រកាន់ថា អ្នកទាំងពីរកំពុងរកស៊ីគួកជេស្រីស្អាតជូនភ្ញៀវជាអ្នកមាន។
កាសែត Sunday Times បានរាយការណ៍ថា បុរសទាំងពីរនាក់ឈ្មោះ Kang និង Park ត្រូវបានចោទប្រកាន់ពីបទនាំតារាស្រីវ័យ២៩ឆ្នាំម្នាក់និងតារាចម្រៀងបីរូបផ្សេងទៀតទៅទីក្រុងឡូសអែនជើឡេស។
កាសែតដដែលនេះលើកឡើងថា តាមការចោទប្រកាន់ តារាស្រីកូរ៉េទាំងនេះបានរួមសិចជាមួយនឹងភ្ញៀវជនជាតិអាមេរិកជាថ្នូរនឹងប្រាក់ ២០.០០០ផោន (ប្រហែល២៨៧០០ដុល្លារ)។
ព័ត៌មាននេះគឺជាព័ត៌មានថ្មីបំផុតជុំវិញការចោទប្រកាន់ជាបន្តបន្ទាប់មកលើវិស័យចម្រៀងប៉ប់កូរ៉េ។
កាលពីខែមករា តារាចម្រៀង Shin Ji soo ដែលគេនិយមហៅថា Jisoo សមាជិករបស់ក្រុមចម្រៀងស្រី Tahiti បានអះអាងថា នាងធ្លាប់ត្រូវបុរសវ័យកណ្តាលម្នាក់មកទាក់ទង ហើយបុរសរូបនេះចង់រៀបចំការណាត់ជួបមួយរវាងនាងនិងបុរសអ្នកមាន។
គេហទំព័រ Kpopstarz.com បានរាយការណ៍ថា នៅលើទំព័រ Instagram តារាចម្រៀង Shin Ji soo បានសរសេរថា គេហ៊ានផ្តល់ប្រាក់១.១០០ផោនដល់នាងសម្រាប់ការណាត់ជួបធម្មតាមួយ។
ក្នុងនោះផងដែរ នាងបានសរសេរថា “សូមកុំផ្ញើសាររបៀបនេះមកខ្ញុំទៀត។ ខ្ញុំយល់ថា វាជាការមើលងាយខ្លាំងណាស់”។ នៅពេលនេះ អាជ្ញាធរកំពុងស៊ើបអង្កេតការអះអាងរបស់តារាចម្រៀងរូបនេះ៕ អរគុណដល់ប្រភព៖ វេហាស៍
